OPENDATA LAB MONGOLIA


    2019 онд Гэр иргэдийн оролцоотой амьдрах орчны зураглалын төвийн тэргүүн асан, иргэний нийгмийн хамтран зүтгэгч Гонгорын Батдорж санаачлагаар OPEN SOCIETY FOUNDATIONS санхүүжилтээр төрийн таван байгууллагын нээлттэй, цахим мэдээллийг нэгтгэж тус хайлтын системд оруулсан билээ.

    Тус төслийг санаачлагч нь оюутан ахуй цагаасаа нийслэл хотоо хүн бүрт ээлтэй хот болгон хөгжүүлэх мөрөөдлөөр жигүүрлэж гэр хорооллыг нэг л өдөр цэвэр агаар сэнгэнэсэн хэн бүхэн амьдрахад таатай орчин болгоно хэмээн хүсэн тэмүүлдэг байв. Улаанбаатар хэмээх нэг хот байвч угтаа гэр хороолол, хотын төв нь эрс тэсийн туйл хоёр өөр ертөнц мэт өнгө ялгарч байгааг шүүмжилж Хоёр хотын цадиг хэмээх үзэсгэлэнг жил бүр дэлгэн түүндээ хотын амьдралын үнэн төрхийг зураглан харуулдаг байв. - [ 1 ]

    Тэрбээр Улаанбаатар хотод тулгамдаж буй асуудлуудтай нүүр тулж харах бүрдээ зорьж тэмүүлсэн хөгжлийг авчрахад авлига, явцуу ашиг сонирхол хамгийн их саад болж буйг шүүмжлэн, үүний эсрэг тэмцэх хамгийн оновчтой арга нь мэдээллээр зэвсэглэж хариуцлага шаардсан иргэний нийгэм гэж итгэн үүнийгээ хүмүүст таниулах, үзүүлэх, ойлгуулахын тулд улс төрчдийн эдийн засгийн хамаарал, төрийн тендерийн мэдээлэл зэрэг нээлттэй өгөгдлийг хайлт хийж хяналт тавихад хялбар болгосон нээлттэй мэдээллийн тус санг хөгжүүлж байсан билээ. - [ 2 ]

    Нээлттэй өгөгдлийн хайлтын систем гэж юу вэ?

    Мэдээлэл, мэдлэгтэй иргэд хариуцлагыг шаардаж, эрхээ эдлэх чадвартай болдог гэдэгт бид итгэдэг. Иймд хариуцлагатай, ил тод, сайн засаглалыг бэхжүүлэхэд үнэн, бодит мэдээллийн сурвалж шаардлагатай байна. Энэхүү хайлтын систем нь анхдагч эх сурвалжийн мэдээллийг засваргүй, ашиглахад хялбар, хүртээмжтэй байдлаар нэгтгэснээрээ онцлог.

    Нээлттэй өгөгдлийн системд өнөөдрийн байдлаар дараах мэдээллийг нэгтгээд байна. Үүнд:
    - төрийн албан хаагчдын хөрөнгө орлогын мэдүүлэг
    - төрийн худалдан авах ажиллагааны мэдээлэл
    - уул уурхайн лицензийн эзэмшигчийн мэдээлэл
    - хуулийн этгээдийн улсын бүртгэлийн мэдээлэл
    - сонгуулийн нэр дэвшигч, үр дүнгийн мэдээлэл

    Энэхүү өгөдлийн сан нь иргэд, залуучуудын утга учиртай, идэвхтэй оролцоог нэмэгдүүлэхэд хувь нэмрээ оруулаасай гэсэн үүднээс бид жишиг дүн шинжилгээ, зурагт хуудсуудыг байршуулж байна. Хайлтын системээ төгөлдөржүүлэхэд санал, туршлагаа бидэнд ирүүлэхийг эрхэм зочин танаас хичээнгүйлэн хүсье.